អន្តរជាតិ៖ ប្រធានាធិបតីអ៊ុយក្រែនលោក Volodymyr Zelensky បានលើកឡើងថាលោកនឹងអញ្ជើញរុស្ស៊ីឱ្យចូលរួមកិច្ចប្រជុំកំពូលសន្តិភាពស្ដីពីសន្ដិភាពអ៊ុយក្រែនលើកទី២ បន្ទាប់ពីសន្និសិទលើកទី១បរាជ័យ។

លោក Zelensky បានថ្លែងប្រាប់សារព័ត៌មាន Bloomberg News កាលពីថ្ងៃទី៤ ខែមិថុនា ថា៖ «ប្រសិនបើកិច្ចប្រជុំកំពូលសន្តិភាពលើកទីពីរមានផែនការបញ្ចប់សង្រ្គាម ហើយយើងមានប្រទេសជាច្រើនទៀត យើងនឹងរៀបចំវា ហើយអ្នកតំណាងរុស្ស៊ីត្រូវតែមានវត្តមាន។ តើនរណា? យើងនឹងឃើញ»។

ប្រធានាធិបតីអ៊ុយក្រែនធ្លាប់បានបដិសេធមិនអញ្ជើញរុស្ស៊ីឱ្យចូលរួមកិច្ចប្រជុំកំពូលសន្តិភាពស្ដីពីសន្ដិភាពអ៊ុយក្រែនលើកដំបូងនៅប្រទេសស្វីសកាលពីខែមុន ជាមួយនឹងការបោះសម្ដីថារុស្ស៉ីចូលរួមបាន លុះត្រាតែបោះបង់ចោលទឹកដីដែលវ៉ៃបាននៅអ៊ុយក្រែនឲ្យអ៊ុយក្រែនវិញ។

កម្ពុជាក៏ត្រូវបានអ៊ុយក្រែនអញ្ជើញទៅចូលរួមកិច្ចប្រជុំស្ដីពីសន្ដិភាពអ៊ុយក្រែនផងដែរកាលពីចុងខែឧសភា ឆ្នាំ២០២៤ តែបដិសេដ ខណៈដែលប្រធានព្រឹទ្ធសភាសម្ដេចតេជោ ហ៊ុន សែន លើកឡើងជាមុនថាកិច្ចប្រជុំនេះនឹងមិនមានផ្លែផ្កាទេបើគ្មានភាគីរុស្ស៉ីនោះ។

សម្ដេចតេជោ ហ៊ុន សែន បានបង្ហោះលើបណ្ដាញសង្គមរបស់សម្ដេចកាលពីថ្ងៃទី៧ ខែមិថុនាថា៖ «សន្និសីទមិនទទួលបានជោគជ័យទេ ប្រសិនបើភាគីពាក់ព័ន្ធពិសេសរុស្សុី មិនត្រូវបានអញ្ជើញឲ្យចូលរួម។ ខ្ញុំបានប្រាប់គាត់បន្ថែមថា មុនសន្និសីទពេលសន្និសីទ និងក្រោយសន្និសីទ រុស្សុីនឹងវាយខ្លាំងលើសមរភូមិយោធា។ ខ្ញុំក៏និយាយបែបនេះទៅកាន់អគ្គនាយក CIA នៅថ្ងៃ២មិថុនា និងរដ្ឋមន្ត្រីការពារជាតិអាមេរិកថ្ងៃ៤មិថុនា ពេលពួកគាត់មកជួបជាមួយខ្ញុំ»។

ជាលទ្ធផលកិច្ចប្រជុំកំពូលស្ដីពីសន្ដិភាពអ៊ុយក្រែនដែលធ្វើនៅថ្ងៃទី១៦ ខែមិថុនា គឺគ្មានលទ្ធផល និងបរាជ័យពិតមែនដោយមិនអាចចេញសេចក្ដីថ្លែងការណ៍រួមបានខណៈរុស្ស៉ីបោះសំដីថា៖ «គ្មាននរណាម្នាក់ក្នុងចំណោមអ្នកចូលរួមនៅក្នុង "វេទិកាសន្តិភាព"នោះដឹងពីអ្វីដែលគេកំពុងធ្វើ ឬដឹងពីតួនាទីរបស់ខ្លួននោះទេ»៕